मराठी चित्रपट सृष्टीतील ज्येष्ठ अभिनेते किशोर नांदलस्कर यांचं कोरोनाने निधन;

मराठी चित्रपट सृष्टीतील ज्येष्ठ अभिनेते किशोर नांदलस्कर यांचं कोरोनाने निधन;

मुंबई- मराठी चित्रपट सृष्टीतील ज्येष्ठ अभिनेते किशोर नांदलस्कर यांचेही आज कोरोनाने निधन झाले. काही दिवसांपूर्वीच त्यांना कोरोनाची लागण झाली होती. यानंतर तातडीने त्यांना ठाण्यातील रुग्णालयात दाखल करण्यात आले होते. आज दुपारी १२:३० च्या सुमारास त्यांची प्राणज्योत मालवली. काही वर्षांपूर्वी किशोर नांदलस्कर यांना दम लागणे, छातीत धडधडणे असे शारीरिक त्रास सुरू झाले होते. वैद्यकीय तपासांनंतर त्यांच बायपास करण्यात आल होत.

मराठी प्रमाणेच हिंदी सिनेमांमध्येही त्यांनी स्वतःची अशी अनोखी ओळख निर्माण केली आहे. नांदलस्कर यांनी आतापर्यंत ४० नाटके, ३० हून अधिक मराठी आणि हिंदी सिनेमे तसेच २० हून अधिक मालिकांमध्ये काम केले आहे. 

किशोर नांदलस्कर यांच्या रंगभूमीच्या कारकिर्दिबद्दल बोलायचे झाले तर ‘नाना करते प्यार’ हे त्यांनी व्यावसायिक रंगभूमीवर केलेलं शेवटचं नाटक होतं. ‘विच्छा माझी पुरी करा’ हे नाटक दिग्दर्शन पुरुषोत्तम बेर्डे यांनी नव्याने रंगभूमीवर सादर केलं. यावेळी दिलीप प्रभावळकर यांची नाटकातली ‘राजा’ची भूमिका किशोर यांनी साकारली होती.

याप्रमाणेच ‘वासूची सासू’ हे नाटकही नव्याने सादर करण्यात आलं होतं. यातीलही प्रभावळकरांची भूमिका नांदलस्कर यांनी साकारली होती. या दोन्ही भूमिका नांदलस्कर यांनी आपल्या खास अंदाजात सादर केल्या होत्या. व्यावसायिक रंगभूमीवर किशोर नांदलस्कर यांनी ‘चल आटप लवकर’, ‘भ्रमाचा भोपळा’, ‘पाहुणा’, ‘श्रीमान श्रीमती’, ‘भोळे डॅम्बीस’, ‘वन रूम किचन’ इत्यादी नाटकांमधून प्रेक्षकांचं मनोरंजन केलं होत.

‘सारे सज्जन’, ‘शेजारी शेजारी’, ‘हळद रुसली कुंकू हसले’ या मराठीतल्या गाजलेल्या सिनेमांप्रमाणेच त्यांनी महेश मांजरेकरांच्या ‘वास्तव’ सिनेमातून बॉलीवूडमध्ये प्रवेश केला. ‘जिस देश में गंगा रहता है’, ‘तेरा मेरा साथ है’, ‘खाकी’ ‘जान जाए पर वचन न जाए’, ‘ये तेरा घर ये मेरा घर’, ‘हलचल’, ‘सिंघम’ या हिंदी सिनेमांतील त्यांच्या भूमिका विशेष गाजल्या.

author

    Related Articles

    प्रतिक्रिया व्यक्त करा

    आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत